सातारा : शेंद्रे येथील आँको लाइफ कॅन्सर सेंटरतर्फे मौखिक कर्करोग दिनाचे औचित्य साधून २७ जुलै रोजी रुग्ण आणि त्यांच्या नातेवाईकांमध्ये मौखिक कर्करोगाबाबत जनजागृती करण्यासाठी रुग्णालयातील कर्करोग शल्यचिकित्सक विभाग, दंत विभाग आणि कर्करोग प्रतिबंध विभाग यांच्या संयुक्त विद्यमाने मोफत शिबिराचे आयोजन केले होते.
या प्रसंगी रुग्णालयाचे अध्यक्ष व कार्यकारी संचालक उदय देशमुख, कर्करोग प्रतिंबध विभागाचे प्रमुख डॉ. अर्जुन शिंदे, कर्करोग शल्यचिकित्सा विभागाचे डॉ. मनोज लोखंडे रेडीएशन तज्ञ डॉ. करण चंचलानी व दंत विभागाचे प्रमुख डॉ. नकुल परशरामी यांच्यासह रुग्ण, तसेच नागरिक मोठ्या संख्येने उपस्थित होते. या कार्यक्रमासाठी हॉस्पिटलच्या समुपदेशक निलम राजपूत यांचे मोलाचे सहकार्य लाभले.
समाजात कर्करोगाविषयी अनेक गैरसमज असल्याने कॅन्सर हा शब्द ऐकल्यावर अनेकदा रुग्णांचे मनोबल ढासळते. म्हणूनच आँको लाइफ कॅन्सर सेंटरच्या माध्यमातून कर्करोगाविषयी जनजागृती व रुग्ण प्रबोधन व्हावे यासाठी विविध कार्यक्रमांचे आयोजन सातत्याने केले जाते. अत्याधुनिक उपाचार पद्धती व अद्ययावत तंत्रज्ञानाची सांगड घालत उपचार उपलब्ध करून देण्याचा सेंटरचा प्रयत्न असल्याचे देशमुख यांनी प्रास्ताविकात सांगितले.
या प्रसंगी दंतरोग तज्ञ डॉ. परशरामि यांनी १००हून अधिक नागरिक आणि रुग्णालयातील कर्मचाऱ्यांची मोफत मौखिक तपासणी केली. या वेळी उपचार घेत असलेल्या रुग्णांनी कॅन्सरविषयी, तसेच त्यांना ‘आँको लाइफ’द्वारे दिलेला विश्वास व उपचारपद्धतीचा विशेष दाखला देत डॉक्टरांप्रती सद्भावना व्यक्त केली.
डॉ. मनोज लोखंडे यांनी मौखिक कर्करोगविषयी काही ठळक मुद्दे अधोरेखित केले. ते म्हणाले, ‘प्रत्येकाने तंबाखूजन्य पदार्थांपासून स्वत:ला मुक्त केले, तर नक्कीच तोंडाचा कर्करोग होण्यापासून स्वत:चे रक्षण करू शकतो; तसेच कोणतीही लक्षणे दिसल्यास वेळ वाया न घालवता योग्य डॉक्टरांची भेट घेणे आवश्यक आहे.’
